له‌مباریه‌وه‌  "کاروان عارف" به‌ڕێوه‌به‌ری شاره‌دێی حاجی ئۆمه‌ران به‌ ئاژانسی په‌یامنێری  راگه‌یاند: شه‌وی رابردوو هێزێکی کۆماری ئیسلامی ئێران هه‌ڵیان کوتاوه‌ته‌ سه‌ر دوو مێگه‌له‌ مه‌ڕی شوانکاره‌کانی ناوچه‌که‌ و ده‌ستیان به‌سه‌ر 800سه‌ره‌ مه‌ڕ داگرتووه‌.

کاروان عارف روونیشی کرده‌وه‌: پێشتریش ئێران چه‌ند جار شوانکاره‌ کورده‌کانی ده‌ستگیر کردووه‌ تاکو ماوه‌یه‌کی زۆر ئازادی نه‌کردوون و زیانیشیان به‌ رانه‌ مه‌ڕه‌کان گه‌یاندوه‌.

ناوبراو گوتی: بۆ چاره‌سه‌ر کردنی کێشه‌که‌ش  پارێزگاری هه‌ولێر و لایه‌نه‌ په‌یوه‌ندی‌داره‌کانمان ئاگادار کردۆته‌وه‌.

به‌ڕیوه‌به‌ری حاجی ئۆمه‌ران ئاماژه‌ی به خراپی  بارودۆخی مه‌ڕداره‌کاندا و گوتی: ئه‌و نائارامیه‌یی سنووره‌کان ده‌بێته‌ هۆی وازهێنانی شوانکاره‌کان له‌ به‌خێوکردنی ئاژه‌ڵه‌کانیان.

"مشیر هه‌ریری" که‌ شوانکارێکی ناوچه‌که‌یه‌، گوتئ: له‌ کاتی بردنی مه‌ڕه‌کان ئه‌و هێزه‌ی کۆماری ئیسلامی  ته‌قه‌یان له‌ ژن و منداڵه‌که‌یان کردووه‌، به‌ڵام که‌س به‌رنه‌که‌وتووه.

ناوبراو گوتی: داواکارین حکومه‌تی هه‌رێمی کوردستان چاره‌سه‌ری  کێشه‌ی نائارامی سه‌ر سنووره‌کان بکات، چونکه‌ ناتوانین به‌و بارودۆخه‌وه‌ به‌رده‌وام بین له‌سه‌ر به‌خێوکردنی  ئاژڵه‌کانمان.

مشیر ره‌تیشی کرده‌وه‌ شوانکاره‌کان  سنووری کۆماری ئیسلامی ئێرانیان به‌زاندبێت و گوتی: ئه‌و شوێنه‌ی که‌ ئێستا رانه‌ مه‌ڕه‌کانی تیادا بردراون چه‌ندین ساڵه‌ واری مه‌ڕدارانی ناوچه‌که‌ بووه‌.